Nivi Olsen Nuummit nuulersoq
Nivi Olsenip ilaquttanilu Nuummit nuunnissaminnut nassuiaatigaa ernermi Nuup avataani inuuneq misigisariaqaraat.
Aammattaaq Qeqertarsuarmi najugaqarnerminni ilaquttani piffissaqarfiginerussallutik neriuutiginerarpaa. Ukiummi kingulliit sisamat Nivi Olsenimut ulapinnarsimapput, Inatsisartunut ilaasortaallunilu Kommuneqarfik Sermersuumi kommunalbestyrelsimut ilaasortaagami.
- Anaanatut politikki assut piffissamik nukinnillu atuiffingisimavara. Massakkulli misigisimavunga piffissanngortoq ilaquttama piffissaqarfigilluaqqilernissaat peqataanillu nukappiaraatinnut takutillugu Nuup avataani aamma inuuneq allatorluinnaq ilusilik ingerlanneqarsinnaasoq, tusagsassiorfinnut nalunaaruteqarluni taama allappoq.
Nivi Olsen Qeqertarsuarmiinnermini Inatsisartuni sulinini ingerlatiinnassavaa Kommuneqarfik Sermersuumili borgmesterip tullersortaatut siullertut sulinngiffeqarallassalluni.
