Nivi Olsen: Allatut tapiisarnerup tusagassiuutit nutarsassavai
Tusagassiuutinut tapiissuteqartarneq, oqallisaaqisoq, ilaatigut sammineqarpoq.
Sermitsiamut AG-mullu 2 millioner koruunit tapiissutigineqartaraluartut tusagassiuutinut allanut tunniunneqarsinnaanissaat sulissutigineqartoq, Kultureqarnermut naalakkersuisup Nivi Olsenip tusagassiortunik katersortitsinermini ilaatigut saqqummiuppaa.
Taamaasiornikkut tusagassiuutit nutarsarneqassasut, Nivi Olsen isumaqarpoq.
- Sermitsiaq.AG piumasaqaatinik naammassinnittussatut siornatigut kisimi inissisimasimavoq. Tusagassiortut pikkorissut namminneq aallartikkusuttut arlaannilluunniit tusagassiornerup iluani projekteqarniartut periarfissikkusullugit allannguivugut, Nivi Olsen oqarpoq.
Tusagassiuutinut tapersiisarnermi aaqqissuussami nutaami tapertinniarlutik qinnuteqartunut piumasaqaateqarneruvoq, tusagassiuutit qinnuteqarniartut akisussaasumik aaqqissuisoqartariaqartoq tusagassiuutillu pisortanut attuumassuteqassanngitsoq ilaatigut piumasaqaataallutik.
Tapiissutit aamma sulianut ataasiakkaanut kisimi tunniunneqarsinnaassasut sulissutigineqarpoq.
- Qanorluunniit sinneqartoortigigaluaraanni ukiut tamaasa qanoq taperneqassalluni nalunngereerlugu sulisarnermut inuiaqatigiillu aningaasaataat taamak atorneqarneri allanngortikkusuppara. Nutaallu periarfissikkaanni qanoq sikkertigissanersut aamma takuniarpara, Nivi Olsen oqarpoq