Nivi Ilinniagaqarnersiuteqarnermut sukaterinialertoq
![](/sites/default/files/styles/image_934x467/public/article_images/nivi-olsen5.jpg?itok=o83VB2NS)
Ilinniagaqartut sivisuallaartumik ilinniartuusarput amerlavallaartullu ilinniakkatik naammaasinagit taamaatittarput.
Tamassuma allangortinneqarnissaanut ilinniartitaanermut Naalakkersuisoq Nivi Olsen siunissami ilinniagaqarnersiutit tunniunneqartarnerinut kajumissaaruteqarpoq aammali sukangasaaruteqarpoq.
- Anguniagarput tassaavoq ilinniartuutigut piffissaq eqqorlugu naammassisarnissaat,
Ilinniartitaanermut Naalakkersuisoq Nivi Olsen taama oqarpoq.
Ilinniagaqarnersiutit siunissami tuniunneqartarnissaannut missingersuummik Nivi Olsen ullumi saqqummiussivoq
Aaqqissuussinissami nutaami, ilinniarfinni ingerlaqqiffiusuni ilinniartut nalinginnaasumik ilinniakkap sivisussusianik ilinniartut ilinniagaqarnersiutisisinnaapput nalinginnaasumik qiortagaqarluni ingerlatsinermi.
Ilinniakkamik kinguaattooraani tamanna nammineq akilerneqartalissaaq.
- Nunatsinni ilinniarusuttut amerliartorput, kisiannili ilinniakkaminnik kinguaattoortut aamma amerlasoorujussuullutik, taakkualu tamaasa inissaqartinniarutsigit ilinniarsimasutullu aningaasatigut annertupaamik pissarsissutiginiarutsigit, taava aamma politikkikkut sinaakkutit pilersittariaqarpagut, Ilinniartitaanermut Naalakkersuisoq Nivi Olsen oqarpoq
Illinniagaqartulli nalinginnaasumik ilinniakkamik sivisunerusumik ingerlatsisut puiguinneqassanngillat. Taakkua ilinniarnerminnut atatillugu taarsigassarsisinnaassapput.
Aammali taakkununnga nutaanik piumasaqaateqassaaq.
Ilinniarnermut atatillugu taarsigassarsiat siornatigut Namminersorlutik Oqartussanit tapiiffigineqartarput, iingerlaannaartumik tamakkiisuutinneqartartunik. Tassalu ilininarnermi attartukkanit 10.000 koruuninik tarsersuigaanni, taava Namminersorlutik Oqartussat aamma 10.000 koruuninik tarsersuisarput.
Tapiissutigineqartartulli maanna affaannannngortinneqassapput, taamaattorli ilinniagaq nalinginnaasumik sivisussusilimmik naammassigaanni imaluunniit 26-nik ukioqalertigani naammassigaanni tapiissutigineqartut tamakkiisumik pineqassallutik.
IIinniarneq aallartikkaangat taarsigassarsiat erniaqartarlissapput
Ilinniarnermut atatillugu taarsigassarsiat ilinniarneq aallartikkaangat erniaqarlertassapput siornatigut ilinniarneq naammassigaangat erniaqartinneqartarsimagaluarlutik.
Allannguutissatut siunnersuut maanna tusarniaassutigineqarpoq inatsisartullu upernaakkut ataatsimiineranni oqaluuserineqarnissaa naatsorsuutigineqarpoq inatsillu aappaagu aggustip qaammataani atuutilersinnaassalluni