Nivemut tusarnaariaqarluarpoq

Nive Nielsen nipilersortartunilu The Deer Children ippassaq unnukkut nipilersormata hunnorujut sinnerlugit tusarnaariarput. Husetimi Københavnimi Magstrædemiittumiit tusarnaariat naammagineqarput.

Nipilersoqatigiit nuannaartorilluagaat Howe Gelp kissassaaqqaarpoq. Taanna nipilersortunilu The Giant Sand Nive Nielsenip immiussaani siullermi aamma nipilersoqataapput. Tusarnaartitsineq nalinginnartut ingerlanneqanngilaq - Howe Gelp ilaannikkut erinarsuut naaqqajanngitsoq maanaannaq uneriarluni oqaluttualertarpoq, saxofonertartorlu Andrew D´Angelo piareersimanngivissoq aamma qaqiteriarlugu nipilersoqatigalugu.

Tusarnaartitsineq periataarsinnaanermik pisunillu iluatsitsiinnarsinnaanermik takutitsivoq. Soorlu Nive Nielsenip aappaatalu Jan de Vroedep nipilersortui aamma sumi tamaani naapinnikkut suleqatigineqalernikuupput, erinnallu angalanerup nalaani immiussisarfinni assigiinngitsuni ilaanni nipilersortartulluunniit suli tusanngikkaat immiuttarpaat.

Nive Nielsenip erinarsuutit siullermik saqqummersitamineersut amerlanerit nutaanik marlunnik ilallugit erinarsorpai. Nipilersoqatigiit Cardinals erinarsugaat ataaseq kiisalu Nive Nielsenip nammineq erinniani Easily atorpai, tusarnaartut alutorsarlutik qungujulallutik tusarnaartut.

Nivekkut unnugu Århusimi Musikcafémi tusarnaartitseriarlutik Belgia aqqusaariarlugu amerikami ilaatigut Texasimi festivalerujussuaq SXSW, South By Southwest peqataaffigiartussavaat. Nipilersortartut belgiamiut sisamat canadamiullu marluk ilagalugit nipilersuutinik assigiinngitsorpassuarnik nassarlutik Nive Nielsenikkut angalaassapput.

Nive Nielsen erinarsuutinik nutaanik arlalinnik immiussaqareerpoq, qaquguli saqqummersitseqqissanerluni suli nalugallarpaa.