Nive Nielsen nipilersortartunilu The Deer Children Nuummi Kulturikkut Illorsuarmi Katuami sapaatip-akunnerani kingullermi nipilersoramik nuutinik 5000-inik tunisaqarsimanertik pissutigalugu kuultimik akissarsitinneqarput. Maannalu Danmarkimi, Belgiami Tuluillu Nunaanni angalaarput, kingornalu USA-liassallutik.
TV-qarfissuaq MTV nittartakkamini allappoq, Nive pikkoringaarami uppernarpianngitsorluunniit:
- Hawaiimiut guitareerannguat, ukulele, aappaluttoq atorlugu nipilersortarpoq. Asanninneq, tuttut kaffiliornissaminillu puigortoortarnini erinarsuusiarisarpai. Erinarsortarnera jazzerpalaangajallunilu koorporpalaartarpoq. Erinarsugai tusaqqoornartorujussuupput puigunaallutillu. Nive tassaavoq kalaaleq kisiartaalluni ukulelertartoq, isornartorsiuisartut ilaat Nivemik nuannarinneqisoq allappoq.