Niuernermi ilinnialertorpassuit
Ilinniartut nutaat aatsaat taama amerlatigisut Nuummi Niuernermik Ilinniarfimmi ullumi aallartissapput.
Nuummi aallartittussat 56-pput, Qaqortumi Niuernermik Ilinniarfimmi ilinniartut 40-t aamma aallartissapput.
Niuernermi Ilinniarfimmi ilinniartunngorniaraanni ilinniartunngortussat sulisitsisuminnut ukiuni sisamani atuuttussamik isumaqatigiissusiorsimanissaat piumasaqaataavoq, maannalu taama amerlatigisut qinnuteqarsimanerisa takutippaat, pisortani namminersortunilu suliniaraannni ilinniagaqarnissaq qanoq soqutigineqartiginersoq.
Ilinniagaqarnissap soqutigineqarnerujussuata kingunerisaanik Niuernermik Ilinniarfimmi init atuarfiusussat naammanngillat, ullumikkullu aallartittussat Nuummi Jagtvejimi Tusagassiortunngorniat Ilinniarfianni ininik attartussunneqassapput.
TNI aqqutigalugu ilinniagaqarnermut Nuummi Niuernermik Ilinniarfimmi ataqatigiissaarisoq John G. Jensen taama nalunaarpoq.
Niivinermi ilinniarfimmi Nuummi ilinniartut 56-t ullumi aallartittut saniatigut ilinniartut allat 75-t ilinniakkaminnik ingerlatsereersut ilinniartuupput.
