Niueqatigiissinnaaneq eqqarsaatigilluaqqutaa

Island-ip Savalimmiut nunattalu akornanni killeqanngitsumik niueqatigiissinnaanerat pillugu, nunat avannarliit killiit siunnersuisoqatigiivinit siunnersuutigineqarsimasoq, ullumi inatsisartuni ataatsimiinnermi eqqartorneqarpoq. Tassunga atatillugu Nunanut Allanut Naalakkersuisoq Josef Motzfeldt, eqqarsarluaqqissaaqqaarnissamik inatsisartuni ilaasortanut kaammattuivoq.

- Nunat avannarliit killiit isumaqatigivagut, nunat eqqaamiugut suleqatiginerunissaanik. Nunalli taakkua marluk killeqanngitsumik niueqatigiiffissamissut isumaqatigiissutigeriigaat allanngortinnagu ilannguffiginissaa isumaliornartoqartipparput. Pissutsit Island-ip Savalimmiullu akornanni atuuttut, Nunatta Islandillu akornanni pissutsit allarujussuusinnaapput. Killeqanngitsumillu isumaqatigiittoqassappat nunat tamarmik iluaqutigisinnaasaanik pisoqartariaqarpoq. Naalakkersuisuninngaanniit uagut siunnersuutigaarput iluaqutissartaqarnersoq misissorluarneqaqqaarnissaa.

Naalakkersuisoq Josef Motzfeldt, Bikki Reimerimit oqaloqatigineqarluni taama oqarpoq.