Nittartagaq nutaaq atulerpoq
Aappariit Karolina aamma Kristian Sørensen nittartakkamik pilersitsisuupput.
- Illoqarfipput assigiinngitsorpassuarnik pisoqarfiusarpoq, kisianni aaqqissuussinerit ilaat qaangiutereersut aatsaat tusartarpavut. Taamaattumik nittartakkami tassani pisussanut allattuiviup atorneqalernissaa neriuutigaarput, taamaaliornikkut aaqqissuussinerit assigiinngitsut orniarneqarluartalernissaat anguneqarsinnaalissammat, aappariit tusagassiuutinut nalunaarumminni allapput.
Apeqqutit akiuminaassinnaasut nittartakkami aamma akissuteqarfigineqarsinnaalissapput, assersuutigalugu floorball imaluunniit kajakpolo pillugu paasissutissat tassani nassaarineqarsinnaalissallutik.
- Nittartagaq iluatsissappat innuttaasut peqataanissaat pisariaqarpoq. Tassami pisussat assigiinngitsut nammineq ilisimasavut naapertorlugit ikkussortartussaavagut, taamaattumik innuttaasut oqaaseqaammik allakkusuttut imaluunniit pisussanut allattuivimmut ikkusserusuttut peqataaqqullugit kaammattorusuppavut, Kristian Sørensen oqarpoq.