Nittartagaq nutaaq atorlugu niuerniarnissaq ajornannginnerulersinneqassaaq

Kalaallit Nunaanni pisiniarfiutillit annersaata Pilersuisup, sumiiffimmi Europap kitaatut angitigisumi 65-inik pisiniarfiuteqartup, pisisartunik sullissinini aamma tuniniaanini annertusiniarpaa nittartagaq nutaaq siuarsimalluartoq atorlugu. Taanna sapaatit akunnerani uani saqqummiunneqassaaq nittartakkatut www.pilersuisoq.gl –ikkut. Nittartagaq Namminersorlutik Oqartussat pigisaanni suliffeqarfissuarmi KNI A/S-imi niuernermik aamma sullissinermik ingerlatsisumi, niuernermik ingerlatsivinnik makkuninnga: Pilersuisoq, Polaroil, KNI Engros, internetsikkut pisiniarfik Pisisa.gl aamma uumasunik toqoraavimmik Neqimik piginnittuusoq.
Allattoq Peter Troelsen, Simon Uldum
marsip 25-at 2013 10:54

Pisiniarfiit ataasiakkaat aamma Sisimiuni qullersaqarfiup akornanni ungasissuseq 2.000 kilometerinik isorartussuseqarsinnaammat nittartakkami isumagineqarput immikkut unammilligassat, tassa pisiniarfiit qanoq ittuussutsimikkut assigiinngitsuusut tallimat akornanni neqeroorutit aamma pisisartut 23.000-it missaanniittut Pilersuisumut tunngaviusut, pisiniarfiit nunaqarfinni aamma illoqarfinni 65-ini inississimapput.

Nittartagaq nutaaq atituumik nittarsaanneqassaaq periarfissat tamaasa atorlugit: Aviisit neqeroorutit, internettimi nittarsaassinikkut, aviisitigut aamma KNR-imi tv-ikkut pilerisaarutitigut. Suliassaq tassaasimavoq periarfissalimmik aamma nikerarfiusinnaasumik nittartagaliornissaq, tassani neqeroorutit pisiniarfiit assigiinngitsut arlaannut tunngasut takuneqarsinnaassallutik. Nunap assinga Kalaallit Nunaat atorlugu pisisartut pisiniarfik pisiniarfiginiagartik nanisinnaavaat. Naak nunaqarfimmi pisiniarfik kisiartaagaluartoq, taava imaattoqartarpoq pisiniartut pisiniarfinnut allanut ingerlaqqittarlutik. Nittartakkami aammattaaq takuneqarsinnaapput nioqqutissat pingaarnerit pisiniarfinni assigiinngitsuni ataasiakkaani suut pigineqarnersut,pisiniarnermut aamma nittarsaassinermut pisortaq Kurt Lauritsen, KNI A/S, oqarpoq.

Pilersuisup pisiniarfiinut pisortaq Frederik Olsen oqaluttuarpoq pisiniarfinni aamma qullersaqarfimmi sulisut tamarmik nittartagaq nutaaq pillugu ilisimatinneqarsimasut. Nittartagaq nutaaq soqutiginarnerutinniarlugu saqqummiunneqarneranut atatillugu poorskip tungaanut pisiassanik immikkut neqerooruteqassaaq aamma unammisitsisoqassalluni.

-Pisiniarfiutigut amerlasuut illoqarfinni aamma nunaqarfinni ataasiakkaani qitiulluinnarput. Tassa ulluinnarni atugassanut pisiniarfittut atuutiutigalutik aammattaaq internetsikkut pisiniartarfimmut pisisa.gl-imut, orsussaarniarfimmut Polaroil-imut peqqumaasivittut atuupput, aamma aningaaserivittut  allakkerivittullu atorneqarlutik. Nittartagaq periarfissarissaartoq atorlugu taava periarfissaqalissaagut pisisartut iluarisimaarinninnerannik annertusititsinissamik, aamma neqeroorutit pissanganartut aqqutigalugit nunaqarfimmi najugallit illoqarfimmiusulli neqeroorfigineqarluartutut misigisaqarterusuppavut," Frederik Olsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq