Nissiaqqat piareeqqereerput

Ukioq manna juulleriartulerpat nissiaraq toqqorsivimmioq Nukappi aamma nissiaraq paasiniaasartoq Nive meeqqat malinnaavigisinnaajumaarpaat.
januaarip 19-at 2012 06:50

KNR-TV-mi 2012-mi ammartagassaqTumit Productionimit maanna piareersarneqaleruttorpoq.

Nissiaraasaartussat tassaapput Nathan Kreutzmann, Nissi Nukappiusussaq aamma Mudi Berthelsen, Nissi Niviusussaq.

Juullimut ammartagassami juullip inua nissiarapalaanik aallarussaammat nissit inuusuttut ujarlernerat malittarineqarumaarpoq. Tassalu decembarip qaammataani sorpassuarnik paasisassarsiortut malittarineqarsinnaassallutik. Ammartagaq meeqqanut arfinilinniit 15-nut ukiulinnut naatsorsuussaavoq.

- Immiussinerput qaammatip matuma naalernerani aallartissavarput apriilillu qiteqqunnerani naammassinissaa naatsorsuutigalutigu. Immiussinissarput illup iluani silamilu pisassaaq. Sineriammi illoqarfinni assigiinngitsuni aamma immiussisassaagut, annersaatali Nuummi immiunneqarnissaa naatsorsuutigaarput, naammassinissaalu assut qilanaaralutigu, ilitsersuisartoq Aka Hansen oqarpoq.