Nissebandimik pilersitsisoq Uummanniassaaq
Atuakkiortup isiginnaartitsisartullu Flemming Jensen-ip Uummannarniarnissaminut periarfissat tamaasa atorluarusuttarpai. Taamaattumik Danmarkimi angalatitsiseqatigiiffiit ilaanniit aperineqarami Ilulissanut Uummannamullu aasamut angalatsisoorusunnerluni ingerlaannaq akuersisimavoq.
- Angalatitsiviit ilaanniit aperineqarpunga takornarissanut angalassisuusinnaanersunga. Ilulissani angalallassisinnaanera killeqarpoq, taamaattumik taakani ikiorneqassaanga. Kisianni soorunami Uummannamut pigutta angallassissuunga ilisimasannillu oqaluttuarlunga, Flemming Jensen oqarpoq.
'Nissebanden i Grønland'-imut isumassarsisuullunilu allaaserinnittuunermi saniatigut Lunte inuttaaffigaa. Takornarissanullu angallassisuunermit juullimut ammartagaq allaanerungaluaqisoq, takornarissat Uummannamut tikeqatigigunigit immiussisimanertik pillugu oqaluttualaarnissaminut tunuarsimaanngilaq:
-Juulimaap illuanut alakkarterilerutta pissusissamisuussaaq immiussisimanerput pillugu oqaluttualaaruma, illormi taanna immiussinitsinni atorparput, qujanartumillu Uummannarmiut illup ilua aaqqissuutilaarnikuuaat.
Flemming Jensen oqarpoq, imalu naggasiilluni:
- Aamma juullimi pilluarit.
Flemming Jensen Ikerasanni ilinniartitsisuunikuuvoq, angalassinerminilu Ikerasannut aamma alakkerterititsissalluni.
Flemming Jensenip angallassinerani sinneqartoorutit, angalatitsiseqatigiiffik Polar Rejser, Flemming Jensen, hotel-iutilik Arne Niemann, Ikerasammilu atuarfiup pisortaata isumaqatigiinnerisigut, Ikerasammi atuartut sisoraatinik pisiniutissaattut tunniunneqassapput.