Nissebandikkut nuannarineqarluarput
Lunte, Puk, Skipper, Gemyse aamma hr. Mortensen, aallakaatitani immikkoortuni siullerni sisamani qallunaanit agguaqatigiissillugu 989.000-init malinaavigineqarsimapput, ukiuni 17-ini ammartagaqartarnerani isiginnaartut aatsaat taama amerlatigalutik. Danmarkip Radioata nittartagaani tamanna allaaserineqarpoq.
Ammartagaq 1989-imi suliaavoq, Luntemit, tassa Flemming Jensenimit, allagaalluni. Flemming Jensen ukiuni arlalinni Kalaallit Nunatsinni najugaqarsimavoq. Ammartakkap qallunaaqqat kalaallit kulturiannik paasisaqartippai, Luntellu juulimaap ikortaa, Inuk, kalaallisut oqaloqatigisarpaa.
Nissebanden i Grønland TV-kkut sisamassaa aallakaatinneqarpoq. 1993-imi aallakaateqqinneqarami aamma rekortiliivoq. Isiginnaartut taamani 1.136.000-it malinnaasimapput, tamannalu ammartakkat assigiinngitsut DR-imi aallakaatinneqartarneranni qaangerneqarsimanngisaannarpoq.
Ammartagarli nutaaq TV2-kkut aallakaatinneqartartoq, Ludvig og Julemanden, suli nuannarineqarnerusoq paasinarsivoq, immikkoortut sisamat aallakaatinneqarmata isiginnaartut 1.272.000-iusimagamik.
Ammartakkat taakku marluk KNR-TV-kkut aamma takuneqarsinnaapput, aamma Avannaarsuani Nissit - Naja Rosing Olsen, aamma Labradorip Kangia'-imi inuttaasoq, Eqaluk Høegh, angivallaarani inequnaqisoq, tassani inuttaapput.
