NIPITU TAPAmi peqataasut Qaqortumi takutitsilersut
Ilinniartitsisut aqqaneq marluk meeqqat inuusuttullu 42-it qitinnermik nipilersornermillu nuannarisallit Qaqortumi Niuernermik ilinniarfik juulip qulinnganili tiguaqqasimavaat kisimiilluni nipilersornerit, qitittut, nipilersoqatigiit, erinarsoqatigiit immiussinerit erinarsuusiornerillu ilinniartitsissutigineqarsimallutik.
Ilinniartitsisut inuussutissarsiutigalugu nipilersortartuupput qitittartuullutillu. Tamarmik misilittakkatik atorluarlugit agguaakkusuppaat, meeqqat inuusuttullu atuanngiffeqarnerini nuannersunik sammisassaqartikkusullugit.
- NIPITU-TAPAMI ukioq manna peqataarusuttut aatsaat taama amerlatigisimasut ataqatigiissaarisoq, Jakob Søvndahl Skovaa tusagassiuutinut nalunaarummi allappoq.
- Malugisinnaavarput peqataasut aaqqissuussanik taama ittunik pisariaqartitsisorujussuit, inoqatinik peqateqarnermut kulturikkullu sammisaqarnermut sunngiffimminnik atuerusuttut, Jakob Søvndahl Skovaa oqarpoq.
Ilinniarfimmiissimasut tallimanngornermi Qaqortup katersortarfiani naggataarnersiorluni takutitsissaaq. Tassani peqataasimasut ilikkarsimasatik ilaquttaminnut, ikinngutiminnut nunaqqatiminnullu takutissammatigik.
Matut tallimanngornermi nalunaaqutaq 19.45 ammarneqassapput isernerlugooq akeqanngilaq.