Nipisattassiissutit pillugit suliaq: Eqqartuussissuserisut suliffeqarfiata misissuisinnera 180.000 koruuneqartoq

Naalakkersuisut siulittaasuata nipisattassiissutinik qaffaanermut atatillugu attuumassuteqarnerminik eqqartuussissuserisut suliffeqarfiat, Poul Schmidt nammineerluni misissuisippaa. Akiligassartaa maanna takkuppoq.
Poul Schimidtimit eqqartuussissuserisut suliamik kisimiillutik misissuinngillat. Inatsisartut kukkunersiuinermut ataatsimiititaliaa suliamik aamma misissuivoq.
Allattoq Ivik Kristiansen
septembarip 28-at 2020 17:05

180.000 koruunit.

Eqqartuussissuserisut suliffeqarfiata, Poul Schmidtip Naalakkersuisut siulittaasuat nipisattassiissutinut tunngatillugu suliami attuumassuteqarpallaarsimanersoq misissoramiuk taama akeqarpoq.

Kim Kielsenip naalakkersuisoqarfia Inuit Ataqatigiinnit, Sofia Geislerip apeqquteqaataanut akissuteqarnermini allappoq.

Kim Kielsenip nipisattassiissutinik qaffaaqataanermi saniatigut umiatsiaminik aalisartumut attartortitsisimanera saqqummiunneqarmat tamanna ukkatarineqalerpoq.

AAMMA ATUARUK Kukkunersiuinermut ataatsimiititaliaq Kielsenip iliuusaanut sakkortuumik uparuaasoq

Kielsenip naalakkersuisoqarfiata eqqartuussissuserisut suliffeqarfiat, Poul Schmidt suliamik misissuisussanngortippaa. Eqqartuussissuserisut suliffeqarfiata Kim Kielsen attuumassuteqarpallaanngitsoq misissuinermini inerniliissutigaa.

Eqqartuussisuserisut suliffeqarfiutaatali Kielsenip suliamut atatillugu attuumassuteqarpallaaratarsinnaanini nipisattassiissutinik qaffaanissamut ataatsimiinnermi peqataannginnermini Naalakkersuisunut ilisimatitsissutigisimasariaqaraluaraa allappaa.

Poul Schimidtimit eqqartuussissuserisut suliamik kisimiillutik misissuinngillat. Inatsisartut kukkunersiuinermut ataatsimiititaliaa suliamik aamma misissuivoq.

Ataatsimiititaliaq ”sakkortuumik uparuaallunilu” suliap ingerlanerani pissutsit ”isornartortutut” taavai.

Aamma atuaruk