Nipisat suaat Ruslandimi niuffaffissiorneqalerput

Europami suannik niuffaffiit naammagiunnaarlugit Atlantikup avannaani suanniartartut; kalaallit, canadamiut, norgemiut, islandimiut, savalimmiormiut allallu peqatigiillutik suannut niuffaffissanik nutaanik ujaasillutik aallartipput. Niuffaffinnik nutaanik misissuinissanut atugassanik, ukioq manna 75.000 koruuninik, aappaagulu taakku amerlaqataanik KNAPK aningaasaliissuteqarpoq.

Kattuffiup pisortaa John Biilmann ima oqarpoq:

Suaat Europamut maannakkut eqqunneqartartut amerlavallaalernikuugamik. Taassuma saniatigut suannut assingusunik sanaartornerit, tassa suaviunngitsunik, sanaartortoqartalernikuugami, qeqqussanik uuliamik assigiinngitsunillu akuukkanik, tassa suaviunngitsut maqittakkat. Tamakku unammillertinut aamma ilaalernikuupput. Taamaammat niuerfinnik allanik nassaarniarluta aallartippugut, tassanilu russit suasserusussinnaanerat misissorneqassaaq, KNAPK-p pisortaa, John Biilmann, toqarpoq.

Atlantikup avannaani suanniartartut niuffaffinnik allanik ujartuineranni misissuisinneqassaaq Loroma, taanna tassaavoq nunarsuarmi suanniarnermik soqutigisaqartut, soorlu aalisartut, tunisassiortut, pisisartullu suleqatigiiffiat, ukiumut ataasiarluni ataatsimeersuartartoq, taassuma allattoqarfiata Ruslandimi niuffaffiusinnaasut tassa misissussavai.