Nipilersorneq parnaarussanik eqqissisimanerulersitsisarpoq

Kalaallit Herstedvesterimi parnaarussat nipilersornermik pingasunngornerit tamaasa ilinniartinneqartarput. Kalaallisut erinarsorneq nipilersornerlu tarnikkut eqqissisimanerulernermik imminullu uperinerulernermik malitseqartarpoq.

- Tuppallernarpoq, tarnitsigut oqilisaaffigineqarluni tuppallernarpoq,

taama oqarpoq 45-nik ukiulik Piitannguaq, ukiut pingajussaa Herstedvesterimi parnaarussaasoq. Taanna kallerup inneranik atuisumik guitarerpoq, erinnallu atorneqartut arlallit taalliaralugillu erinniarisimavai.

Ilinniartitsisuata, inuuniutigalugu nipilersortartup, Anders Rolandip, kalaallit parnaarussat immikkut misigisaqarfiginerarpai, tassamigooq nipilersortarnertik erinarsortarnertillu pimoorulluinnarlugit ingerlattarmatigik, nipigilluinnartumillu nipilersorsinnaasarlutik, misigissutsit akuutillugit, taamaammallu Anders Rolandip ilinniartitsinini nuannarilluinnarnerarpaa.

Parnaarussivimmi paarsisup, Kisser Voss-ip, kalaallit immikkoortortaanni nipilersoreernerup kingorna eqqissisimanerusarneq maluginiarsimavaa. Ilaatigut imerajuttut katsorsaaviata, Frederiksberg Centerip, katsorsaanera iluaqutaalluni.

- Nunatsinniit avissaartitaanikuuvugut, sakkortuumik inuiaqatigiit akuerisinnaanngisaannik iliuuseqarnikuugatta, oqitsuinnaaneq ajorpoq, tujormisaqaagut, ajunngitsumik inuuniarsaralunga nukippassuit atortaraluarpakka, massakkulli neriuuteqaqqilaalerpunga AA-mi katsorsartinnermut peqataalerama, Piitannguaq oqarpoq.