Nipilersoqatigiit KALAK Nuummi tusarnaartitsilersut
Nipilersoqatigiit Kalak naliliisartunit nersualaarneqaqisut apriilip aallaqqaataani tusarnaartitsinissaannut pilerisaarutitut Katuap tusagassiorfinnut nalunaarutaani taama allassimavoq.
Nipilersoqatigiit 1995-imi saqqummersitsinermik kingorna avissaarput nunatsinnilu taakkuullutik tusarnaartitsinikuunngisaannarlutik.
Nipilersoqatigiit Kalak Aarhusimi kalaallinit ilinniagaqartunit sukisaarsaatigalugu 80-ikkut naajartornerini pilersinneqarput Danmarkimilu aaqqissuussarpassuarni nipilersortarsimapput.
Allat erinniaannik atuisarlutik aallarteqqaarput
Nipilersoqatigiit pileqqaaramik ”Kalattuut Band”-imik imminnut taasarsimapput, aallaqqaammullu allat erinniaannik taamanikkut nuannarineqartunik issuaallutik nipilersortarsimallutik.
Piffissalli ingerlanerani namminneq erinniaminnik taalliaminnillu atortakkatik taarseriartorsimavaat, nipilersoqatigiillu kitaarerpalaamik aallaavilimmik nipilersoriaasiat immikkuullarilluni ilisarnarluartoq pilersinneqarpoq.
Nipilersoqatigiit tassaapput Kaali Olsen, erinarsorlunilu kitaarertoq, Jan Petersen kitaarimik ataasiakkaarisoq, Steen Lynge tumerparpaartoq, Jannik Falhof qatitoortoq, Henrik Storland pattattoq kiisalu H. P. Christensen kitaarertoq.
