Nipangiussisussaatitaaneq qitiutillugu pikkorissarput
Inuit ajornartorsiortut qanoq oqaloqatigineqartassappat aamma nipangiussisussaatitaaneq qanoq paasineqassava? Apeqqutit tamakku kræfteqartunik oqaloqatiginnittartut pikkorissartinneqarneranni, Ilulissani pisumi, oqaluuserineqartut ilagaat.
Allattoq Elisa Isaksen
maajip 25-at 2009 06:57
Pikkorissartitsinermi nappaassuarmut kræftimut akiuiniaqatigiiffiup Neriuffiup aaqqissugaani, tarnit pissusaannik ilisimasalik, Eva Ethelberg, Danmarkimi Kræftens Bekæmpelsemeersoq, pikkorissaasuuvoq.
- Peqataasut ilarpassui kræfteqartuupput imaluunniit kræfteqartuusimallutik, Eva Ethelberg oqarpoq,
- Kræfteqartumik oqaloqateqarneq inuttut immikkullu ilinniagaqarsimasutut oqaloqatiginninneruvoq. Taamaattumik oqaloqateqarnermi nipangiussisussaatitaanerup ilisimaarinissaa pingaaruteqarpoq, Eva Ethelberg oqarpoq.
Nunatsinni tamarmeersut inuit 18-it pikkorissaqataapput. Taakkua tamarmik nammineq kajumissutsiminnik kræfteqartunut oqaloqatiginnittartuupput.
