Nipaallisaataannarnik tunineqartoq
Nukappiaqqap tallimanik ukiullip talini napigamiuk qinnguartarneqanngilaq Ikerasammi nakorsaqannginnera pissutigalugu. Tamassumalu kinguneraa nukappiaqqap Uummannaliaanneqartariaqalernera. Uummannamullu aatsaat tallimanngorpat ingerlanneqarsinnaavoq, qulimiguulik ulluni makkunani inissaqartitsinngimmat.
Nukappiaqqap ataataa Nikolaj Karlsen aperaarput ernera massakkumut qanoq innersoq.
- Takusinnaavarput pullatitsilereersimasoq, taamatullu talia tungujortsereersimasoq, Nikolaj Karlsen oqarpoq.
Qanoq misigisimavit ernerpit talia napinikoq, nakorsamit ikiorneqarsinnaanginnera?
- Angajoqqaatut qanoq iliuusissaaleqinarpoq, nammineq meerarisaq taama pineqartoq isigalugu. Isumaqarpunga sumiginnaanerusoq nakorsaqarfimminngaaniit suneqannginnera. Angajoqqaatut naammaginanngeqaaq, Nikolaj Karlsen naggasiivoq.
Uummannami nakorsat taartaat Øistein Ylvisaker radioaviisimut oqarpoq, nukappiaqqap ajutoorsimanera pinartutut nalilerneqarsimanngimmat, aatsaat tallimanngorpat Uummannamut apuunneqassasoq.
