Nioqqutigisani akisunaarsimallugu Pilersuisoq A/S-ip nassuerutigaa
Upernavik marloriarluni umiarsuaqareeraluartoq pisiniarfimmi akit malunnartumik appannginnerarlugit, allallu qaffannerarlugit Upernavimmi pisisartoq Karoline Rosing isornartorsiuivoq.
- Pisiassanut timisartukkut tikisitanut akigitinneqartut nikinngillat, naak umiarsuarmik tikittoqareeraluartoq. Immussuaq, ukioq tamaat 53 koruuninik akeqartartoq, ippassaq 80,95 koruuninik akeqalersimavoq, Karoline Rosing oqarpoq.
Pilersuisoq A/S ataasiarluni kukkussimanerminik nassuerpoq.
- Ilumoorpoq immussuaq aalajangersimasoq maanna tuniniagarput, kukkunitsigut sikuunerani akimik, tassalu 80,95 koruunimik, akilersortikkaluaratsigu. Soorunami 54,95 koruunimut appartereerparput, kisianni immussuaq taanna aatsaat tuninialerparput, Pilersuisoq A/S-ip pisortaa, Lars Behrend, KNR-imut oqarpoq. Taassuma erseqqissarpaa, immussuaq, Karoline Rosing-ip eqqaasaa, Pilersuisumit sikuunera tamaat tuniniarneqanngimmat.
- Iipililli eqqarsaatigalugit ukioq tamaat naliginnarmik aki, tassa 5,95, akigitipparput. Sikuunerani aki akigitissimasinnaagaluarparput, taamaalioratali. Maanna taama akeqarput, aammali 3,95 koruunilinnik tuniniagaqarpugut, Pilersuisoq A/S-ip pisortaa, Lars Behrend, KNR-imut oqarpoq.