Nina Tunumi pernaammik tusarnaartitsissaaq
Nipilersortartut Tasiilami qulimiguullit mittarfiannut tikimmata, nuannarinnittut inuusunnerit Tasiilami Alivarpimmeersut nuannarisartik tikilluaqqujartorpaat.
Nina Tasiilami marloriarluni tusarnaartitsissaaq, tassa timersortarfimmi unnugu taavalu Diskotek Pakhusimi aqagu. Tusarnaartitsinissat taakku marluk illoqarfimmi tapersiinerit aqqutigalugit piviusunngorput, avataaniit tapersersuisunik nassaarnissaq ajornakusoormat, aaqqissuisunit Arctic Wonderland Toursimeersoq Patrick M. Abrahamsen taama ilisimatitsivoq.
Tassa illoqarfimmi suliffeqarfiit tapiinerisigut tusarnaartitsinissat piviusunngortinneqarput.
- Neriuppugut aaqqissuussineq iluatsilluarumaartoq, nipilersortartunimmi tikisitsisarneq taamaalilluta siunissami ingerlassinnaaniassagatsigu, taamalu Kitaata Tunullu immikkoornerujussuat minnerulersillugu.
