Nikolaj Heinrich Nuummi borgmesterinngorpoq

Nuummi kommunalbestyrlsemi ilaasortat ualimut ataatsimiinnerat pissanganartorsiorfiuvoq. Borgmesterinngortitsiniarluni ataatsimiinnermi borgmesterissatut sassartinneqartut pingasuupput. IA-mit borgmesteriugallartoq Malînãnguak' Marcussen-Mølgård sassartinneqarpoq, Siumumiit Nikolaj Heinrich, Demokraatillu Per Berthelsen borgmesterissatut sassartippaat. Taasinermi siullermi Nikolaj Heinrich Siumut arfneq pingasunit taaneqarpoq, Per Berthelsen Demokratineersoq, tallimanik taaneqarluni, Malînãnguak' Marcussen-Mølgård IA sisamanik taaneqarluni.

Ataatsimiinneq unitsinneqarallarpoq, taaneqarnerpaallu marluk qinerneqarnissaannut unitsinneqarallarluni.

Ataatsimiinneq aallartinneqarmat, Nikolaj Heinrich Siumut, Per Berthelsen Demokratit taasitsissutigineqarmata, Nikolaj Heinrich arfineq pingasunik taaneqarluni borgmesteritut qinerneqarpoq, Per Berthelsen tallimanik taaneqarpoq, Inuit Ataqatgiiit borgmesterinngorimut qinersinermut taasinermi kingullermi taaseqataanngilaq.

Nuuk kommuneani borgmesterinngortoq Nikolaj Heinrich Siumut, ima oqarpoq:

Soorunami tupinnalaarpoq pingaartumik suliffik siornatigut eqqarsaatigisimanngisaq taama tassanngaannapajaartumik appakaaffigalugu.

Kisianni aamma nuannaarpunga,t aama tatigineqarlunga atorfimmut innersuunneqarama. Uannut assut nakussatsinnarpoq, sulinissaq pingaartumik eqqarsaatigalugu.

Nikolaj Heinrich taasivinnaasut 17-it ilaannit arfineq-pingasunit taaneqarpoq, tallimat Per Berthelsenimik taasisut sisamallu taasinngitsut.

- Amerlanerussuteqarusussimagaluarpunga, kisianni 13-iinnaat taasipput arfineq-pingasut uannik. Nikolaj Heinrich oqarpoq.

Suliarlu ikaarsaarfigisaa imaannaanngilaq.

- Imaannaanngilaq pingaartumik illoqarfiit annersaanni milliardi koruuninik kaaviiaartitsisumi.

- Kommunalbestyrelsemi suleqatigiit annertupput taamaalilluta suleqatigiilluarnitsigut suliassaq naammassineqareernikuummat siuttorisimasatta peqataaffigisaa, kusanartumik naammassereernikuuarput. Missingersuusiap aappaagu 2008-mi atortinnissaa suliassat pingaarnersarisussaavaat.

Nangillunilu oqarpoq soorunami suliassarpassuit allat takkuttarumaartut, tamakkualu suleqatigiinnermikkut naammassisarnissaat qularinngilaa.

- Politikkikkut nutaraanngilanga. Borgmesteritut sulineq mersernartorsuartut isiginngilara. Nuannaralugu pissangallunga sapernagulu nalunagu ingerlatissavara. Nuummi borgmesterertaaq oqarpoq.

Nikolaj Heinrich Siumukkut ilaasortaatitaannit arfineq-marlunnit Atassutillu ilaasortaatitaanit ataatsimit Hans Pavia Egedemit taaneqarpoq.