Nikku Olsen persuttaasimavoq salluliorlunilu
Nikku Olsenip Inatsisartunut ilaasortaasinnaangitsutut aalajangiiffigineqarnerminut isassisimanini eqqartuussinertaqanngitsumillu isumaqatigiissuteqarsimanini pissutaanerarlugit nassuiaatai ilumoortortaqanngilluinnartut Sermitsiaq.ag-ip ullumi allaaseraa. Ilumoortorli tassaavoq Nikku Olsenip taamani arnaatigisani, arnaatimi qitornaa arfinilinnik ukiulik isigitillugu tilluarlugulu tukkarsimagaa. Tamannalu pissutaalluni Nikku Olsen Inatsisartunut ilaasortaasinnaanngitsutut aalajangiiffigineqarsimavoq.
Partiiata partiip pilersitsisuanik tapersiilluni ippassaq allagaqaateqarnera taamaasilluni eqqumiiginarsinnaavoq, tassanimi isassiinnarsimanera sorujussuanngortinneqartutut aalajangiusimavaat. Nalunaaquttap akunneri 24-t qaangiutinngitsulluunniit tamanna ilumoortuunngitsoq paasinarsivoq. KNR-ip Partii Inuit maannakkorpiaq oqaaseqartinniarsarai, paasisat kingulliit tunngavigalugit siulittaasuminnik suli tapersiinersut apeqqutiginiarlugu.
Nikku Olsenip isassiinnarsimanini eqqartuussinertaqanngitsumillu isumaqatigiissuteqarsimanini ilumuunngitsoq maanna nassuerutigaa. Ilumoortorli tassaavoq eqqartuussinertaqanngitsumik akiligassinneqarnermigut eqqartuussaanissani pinngitsoortissimagaa, inatsisillu naapertorlugit tamanna eqqartuussutitut isigineqarsinnaavoq.
Qinersisartut Nikku Olsenimik qinersisimasut nassuerutigisaanut kingullernut qanoq isumaqarnersoq oqaatigissallugu nalunarpoq, Nikku Olsenilli persuttaasartuuneranik paasineqartut kingorna politikeritut ingerlaannarsinnaanissaa takorlooruminaappoq.
