Niels Busk: Uumasunik illersuiniaqatigiit sioorasaarisarput

Taamatullu sioorasaarerpaluttumik nipilerluni sunniiniarsimaneq puisit amiisa EU-mut eqquteqqusaajunnaarnerannut sakkugilluarsimagaat, Ventret sinnerlugit EU Parlamentimi ilaasortap Niels Buskip oqaluttuaraa. Nammineq eqqusseqqusuinnaarnermut naaggaarsimagaluarpoq.

- EU Parlamentimi ilaasortanik sunniiniartartut uumasunik illersuiniat aatsaat taama peqqarniitsigisumik sunniiniartiilugit malussarfigaakka. Toqqaannartumik saaffiginninnikkut, e-mailikkut, pilerisaarutikkullu sunniiniartarput.

Saamasuusaarlutik aallartikkaangamik politikerinik naapitsillutillu, soorlu uanga amminik eqqusseqqusiunnaarnianermut akerliusunga paasigamikku akeqqersimaalerput, ilami ilaatigut sioorasaarerpaluttutut pissusilersulersulerlutik.

Uumasunik illersuiniaqatigiit paasisinnaanngilaat namminneq isummatik malillugit allaanerusumik isumaqarnera.

Maanna misigisimalerpunga mianersoqqusisariaqalerlunga. Sioorasaarillutillusooq akerlerisaminnik saassussisarneri siunissami sulinissanut akornutaassapput.

- Puisit amiinik eqqusseqqusiunnaarnissaq ukiut marluk matuma siorna siullermeerlugu oqaluuseraarput. Taamanikkut eqqusseqqusiunnaarnissamut akerliusut amerlanerussuteqarluarput. Qanittumili taasissutigineqarmat nalunngeriikkatsitut puisit amiinik eqqusseqqusiunnaarsitsiniartut amerlanerussuteqalersimapput. Tassuunakkut uppernarsarparput sunniiniartartut qanoq pissaaneqartigineri.

Uumasunilli illersuiniaqatigiit sunniiniartartut peqqarniitsut kikkuunerinik Niels Busk, Rumæniamiit oqarasuaatikkut nipilukujuttukkut oqaaseqarusunngilaq.