Niels Boserup: Utaqqisarneq sivikillissaaq

Amerlaqisut – qularnanngitsumik aamma maanimiut – eqqaamasinnaasaattut Kastrupimi mittarfissuarmi isumannaallisaaneq pillugu misissuisarfimmi aasaq kingulleq siuleriiaarpassuarnik utaqqisoqartarpoq.

Kisianni taama pisoqaqqinnavianngitsoq mittarfeqarfimmit ullumi oqaatigineqarpoq. Ullumimi isumannaallisaaneq pillugu misissuisarfik nutaaq anginerusorlu ullumi atoqqaartinneqarpoq:

Sulinngiffeqaraanni Kastrupimi isumannaallisaaneq pillugu misissuisarfiup silataani siuleriiaallutik utaqqisut akornanniinnerminngarnit sissamiinneq nuannernerusarpoq.

- Isumannaallisaaneq pillugu misissuisarfimmut utaqqisut 20 minutsit sinnerlugit utaqqissanngitsut neriorsuutigaara, mittarfissuup pisortaa Niels Boserup oqarpoq.

Aamma taassuma siunertaanerarpaa, timmisartorsuarmut ilaasussat hunnorujuugaangata taakkunannga 95-it minutsit tallimaannaat isumannaallisaaneq pillugu misissuisarfimmukarnissartik utaqqisassagaat.

Ullumikkut angalasussat ilaat tassaavoq 29-nik ukiulik Mikkel Bek, taanna ataatani ilagalugu Romaliarniarpoq.

Mikkeli isumannaallisaaneq pillugu misissuisarfittaap silataani utaqqisunut ilannguppoq nal. 11.56.

Kingunitsiannguagut pisattanut ingerlatitsiviusartumut taskini inissippaa.

Isumannaallisaanermut piumasaqaatit nutaat naammassisinnaajumallugit mittarfissuaq isumannaallisaaneq pillugu misissuisarfiit marluusut matoriarlugit allamik nutaamik anginerusumik ammaavoq.

Tassa isumannaallisaaneq pillugu suliaqartartut ataatsimuulerput amerlineqarlutillu, taamaalilluni misissortittussat sukkanerusumik misissorneqarsinnaaniassammata.

Mikkeli uterfigeqqilaariartigu:

Minutsit sisamat qaangiutiinnartut seqertitsilluni misissuisarfik qaangereersimavaa.

- Aatsaat taama sivikitsigisumik utaqqivunga, Mikkel Bek oqarpoq.

Nalunaaquttap akunnerini siullerni isumannaallisaaneq pillugu misissuisarfiup nutaap ammaffigisaani siuleriaanik utaqqisoqarpianngilaq.

- Tamanna naammagisimaaqaarput, tassami ilaasussat 100-juugaangata 95-it minutsit tallimat utaqqisarnissaat naatsorsuutigaarput ilaasussallu 20 minutsit sinnerlugit utaqqisinneqassanngillat, mittarfissuup pisortaa Niels Boserup oqarpoq.