Nick Nielsenip isiginnaartitsisarfiup pisortaa isornartorsiorpaa
Nick Nielsen oqarpoq Svenn B. Syrin ingasattajaarluni qisuariartoq, suliamilu uani meeqqat sallunaveeqqutiginerat tupigusuutigingaarlugu.
Nick Nielsen aamma isumaqarpoq naalakkersuisoqarfiup aningaasalersuinissamut periarfissat allat pillugit novembarip 11-iani oqaloqatigiinninnissamut aggersaanera isiginnaartitsisarfiup akuerisariaqarsimagaluaraa.
Nick Nielsenili naapertorlugu taamatut qaaqqusineq isiginnaartitsisarfiup qisuariarfiginngilaa.
- Tassungalu taarsiullugu sinerissami meeqqanut isiginnaartitsinissaq taamaatillugu kinguneqartitsilluni sakkortuumik nalunaaruteqarpoq. Tamannalu kukkusumik pingaarnersiunerusoq naqissuserpaa, isiginnaartitsisarfiullu ingerlatassaasa ilarpassuisa Tipsimit Lottomillu aningaasat atorlugit tapiissuteqarnikkut ingerlanneqarsinnaanerat oqaatigalugu.
- Taamaammat oqaloqatigeereertinnata aalajangiisoqarnikuunngilaq uanili oqaloqatigiinnissamik Nunatta Isiginnaartitsisarfia aammaarlunga kaammattoqqissavara, Nick Nielsen oqarpoq.
Aamma ilanngullugu oqaatigaa usiginnaartitsisarfiup siunertaasa ilagigaat sinerissami suliffigivinnagu sumiiffinni isiginnaartitsisartut ineriartornerisa tapersernissaat.
- Taamaammat sipaarutissanik nassaartoqassappat sinerissami ingerlatat sipaaruteqarfigineqartariaqanngillat pingaartumik meeqqanut tunngasut. Nunani allani isiginnaartitsisannginnissaq aamma toqqarneqarluarsinnaavoq, Nick Nielsen naggasiilluni taama oqarpoq.