Nick Nielsenip IOC ataatsimeeqatigaa
Taassuma Nunatsinnit peqataasoq ujakkaartartoq Martin Møller qiimmassarlugu isiginnaarpaa, tamatumali saniatigut nunat tamalaat OL-imut ataatsimiititaliaaneersunik ataatsimeeqateqarluni.
- Maani assigiinngitsorpassuarnik misigisaqarpunga, OL-ertut malinnaavigalugit misigisaq aamma nuannersorujussuuvoq, aamma Nunat tamalaat OL-imut ataatsimiititaliaanni, IOC-mi, ilaasortat aamma oqaloqatigivakka, apeqqutit Nunatsinnut attumassuteqartut oqaloqatigiissutigalugit. Aamma taanna isumaqarpunga misigisarujussuusoq, Kultureqarnermut Naalakkersuisoq Nick Nielsen oqarpoq.
Taassuma ilaatigut OL-imut ataatsimiititaliami ilaasortat marluk Danmarkimeersut, tassaasut kunngissaq Frederik aamma sulorarnermi unammisartuusimasoq Poul-Erik Højer ataatsimeeqatigai. Ataatsimiinnerit OL-imut Nunatsinnullu tunngasunik aalajangiiffiusimanersut Nick Nielsenip oqaatigisinnaanngikkallarnerarpai.
Martin Møllerip 50 kilometerimut ujakkaarnermi siulliit 40-t akornanniinnissaminik anguniakkani ippassaq angunngitsoorpaa. Taannami Sotjimi normu 45-uurulluni apuuppoq.
Kalaallini OL-imut peqataasimasuni angusarissaarnerpaanikuusuni Martin Møller taamaasilluni inissinngilaq, angusanili tulluusimaarutigeqaa:
- Angusakka aatsaat pitsaatigipput. Tulluusimaarutigeqaakka, Martin Møller DR Sportenimut oqarpoq, ujakkaartartut pikkorissut Tyslandimeersut sukkaqatigingajassimallugit unnersiutigalugu.
Ujakkaartartut Ruslandimeersut pingasut ujaminnapput, Martin Møllerilu ajugaasumit taamaallaat minutsinik tallimanik sekundinillu 37-nik kigaannerugami.
