Nick Nielsen: KNR-imi pisoq inuiaassutsimut attuumassuteqanngilaq
Nick Nielsen erseqqissaateqarnissaminut iliuuseqarpoq Nikku Olsen Sermitsiaq nr. 6-imi februarip ulluisa arfineq aappaanni saqqummersussami apeqqusermagu kalaallit tusagassiorfiisa aaqqissuisunik danskiusunik atuinerat.
- Uannut pingaaruteqarpoq erseqqissaatigissallugu, uanga KNR-ip siulersuisuisa nassuiaateqarnissaannik kissaateqarnera KNR-ip nammineq iluani attaveqaqatigiinnermut tunngasuummat, isumannaarniarlugu inuiaqatigiinni tusagassiorfiup KNR-ip arlaannaannulluunniit atanngitsutut tusagassiisartuunissamik pisussaaffimminik naammassinninnissaa, ileqqorissaarnissamik susassaqartullu tamaasa naapertuilluartumik naligiimmillu sullineqarnissaannik piumasaqaatinik eqqortitsisoqarnissaa eqqarsaatigalugu.
Nick Nielsen erseqqissaateqarnermini nuannaarugiaa KNR-imi sulisut sinniisaata pisimasoq pineqartoq akuerisinnaanagu nalunaaruteqarmat.
Nick Nielsenip erseqqissarpaa suliaq namminerminut tassaammat tusagassiortut pitsaasumik ileqqussarsiornissaannut tusagassiortutullu ileqqorissaarnissaannut tunngasumik suliaq. Kultureqarnermut Naalakkersuisup kissaatiginngilluinnarpaa KNR-ip pisussaaffiinik aammalu pitsaasumik tamatigoortumik isorinnittumillu tusagassiornissamut pisinnaatitaaffiinik killilersuisoqarnissaa Nick Nielsen taama allappoq.
- Uanga uani suliami qiterititara tassaavoq tusagassiorneq pitsaasoq. Maluginiarpara Nikku Olsenip aaqqissuisunik danskiusunik tusagassiorfinni atuineq isornartorsiormagu. Uangali aammaarlunga erseqqissassavara uanga pisortaasut sulisuusullu eqqarsaatigalugit qitiutinnginnakku inuiaassuseq imaluunniit sumi inunngorsimaneq. Taamaattumik uani pineqanngilaq danskeq allassimammat, kisiannili allattoqarsimammat.
