Nicholas Symes: Pillaat sakkortuallaaqaaq
Ajortumeeriniatut peqqarniisaarneq, ikiaroornartunut atatillugu peqqarniitsumik pinerlussimaneq, imaluunniit pilersaarusioriarluni toqutsisimaneq uani pineqanngillat. Politikkikkut isiginneriaaseq imaluunniit upperisarsiorneq aallaavigalugit toqutsisimaneq pineqanngillat. Piffissami sivikitsumi paatsiveerutiallanneq pissutigalugu alianartumik pinerlussimaneq uani pineqarmat, angutip inuusuttup taama sakkortutigisumik pillarneqarnissaa uanga isumaqatiginngilluinnarpara, eqqartuussissuserisoq Nicholas Symes oqarpoq.
Angutip inuusuttup qaammatini 15-ini tigummigallagaanerani, tarnikkut nappaateqarnersoq nakorsat marloriarlutik misissortarpaat, tarnikkullu nappaateqanngitsutut nalilermassuk, pinerlussimasut eqqartuunneqartinnagit nakorsat naliliisartut, angut pisuutinneqarpat pillarneqarsinnaasutut nalilerpat. Taakkuali nakorsat naliliisartut, inuusuttunut pineqaatissiissutaasartut naapertorlugit pillarneqarnissaa innersuutigigaluarpaat. Inuusuttunulli pineqaatissiisarneq naapertorlugu pillaaneq ukiunik marluinnarnik sivisussuseqartarmat nakorsat naliliisartut innersuussutaat unnerluussisunit akuerineqanngilaq. Pinerluutigineqarsimasup peqqarniinnera utoqqatsissutigalugu, nakorsat pinerlussimasut pillarneqarsinnaanerannik naliliisartut, tarnikkullu nappaatit pillugit immikkut ilisimasallit, angummik inuusuttumik sukumiisumik misissuereerlutik innersuussutigisaasa akuerineqannginnerat uanga ajuusaarnartutut isigaara, Nicholas Symes oqarpoq.
Gerda Møllerip peqqarniitsumik pinngitsaalineqariarluni toqutaasimanera, angerlarsimaffimminilu imminut ikiorsinnaasimannginnera pissutigalugit, eqqartuussisup pillaatissiiniarnermini eqqarsaatigisimallugit oqarpoq.
Nicholas Symes oqarpoq, John Arpaarti Hans Møllerip pinerlussimanini peqqissimissutigigaa, taamatullu pinerlussimassanani ullut tamaasa neriukkaluartoq. Taama sivisutigisumik tigummigallagaasimanini ineriortornerminut atatillugu ajoraluartumik innarliutigisimavaa, uangali ilakkuminartutut misiginneqatiginnissinnaasutullu isigaara, Nicholas Symes oqarpoq.
Unnerluussisoq Lone Lyngsøe oqarpoq pisimasoq Gerda Møllerip ilaqutaannaannuinnaanngitsoq aammali taamani 15-inik ukiulimmut alianartuusoq
Illersuisuisup eqqartuussissuserisup pillagassanngortitaasullu pillaatissiissut Landsretimut suliareqqitassanngortippaat.
