- Nalugaluarlugu qanoq inerneqarumaarnersoq aqagumut erinisoqaanga, taamaattoq unammisassagut ataqqivakka, Christoffer Mariegård Jensen oqarpoq.
AllStarsimi aqagu unammisussat assigiinnik erinarsussapput.
- Nuummiut marlunnik erinarsortoqarnertik iluaqutigissavaat, qularineqassanngilarli unammersuataartussaagatsigit, Christoffer Mariegård Jensen, pissangaqisoq oqarpoq.
Niarnip erinarsortuisa aappaa, Sabina, sapaatip akunnerani kingullermi peersinneqarpoq, taamaattoqarnera Niarnip erinarsoqatigiivisa nukittorsaatitut ajugaarusunnermillu misigilersippaat.
- Erinarsortutta aappaata annaanera nukittorsaataavoq aamma ataqatigiinnerulernitsinnut pissutaagunarluni, soorunami uuminaqaaq kiserngorullunga erinarsussagama, Christoffer Mariegård Jensen naggasiivoq.
Allstarsimi ajugaasut 250.000 koruuninik akissarsiassaqarput, taakkulu aningaasat illoqarfinni, Nuummi imaluunniit Aalborgimi, meeqqanut inuusuttuaqqanullu ajornartorsiuteqartunut ikiorsiissutaassapput.