Niaqornani aalisartut misileraallutik eqalussuarniarput
Niaqornani aalisartut naliliinerat tunngavigalugu eqalussuit 100-it sapaatip akunnerata ingerlanerani aalisarneqarnissaat naatsorsuutigineqarpoq.
Qaasuitsup kommunia eqalussuarniarnermi aalisarfissanik naleqquttunik toqqaanermi ikiuuttuuvoq.
- Eqalussuarnik aalisarneq avannaani aalisarnermi nioqqutissanik periarfissanillu nutaanik nassaarniarnermi misileraaneruvoq, kommunip nittartagaani taamatut ilisimatitsissutigineqarpoq.
Suliffeqarfik namminersortoq Greenland Company, Tasiilap eqqaani misiliilluni eqalussuarniarnermik suliaqartoq, misileraalluni aalisarnermik suliniuteqartuuvoq.
Eqalussuup amia, avalerai nataqquilu avammut tunisassiarineqalernissaat siunertaralugu Greenland Company Islandimi Kinamilu ammiorfinnik nakorsaasiorfinnillu suleqatiserinnippoq. Japanimissaaq Koreamilu aamma soqutiginnittoqarpoq.
