Nakorsaasiorfissuit qulingiluat coronavirusimut akiuussusiornermut isumaqatigiissuteqartut
USA-mi Europamilu nakorsaasiorfissuit qulingiluat coronavirusimut akiuussutissaliorniarnermi ilisimatuussutsikkut maleruagassanik sukannersunik naapertueqqissaarlutik akiuussutissamik ineriartortitsinissartik isumaqatigiissutigaat.
Aviis The New York Times tusagassiorfiillu allat taama tusarliipput.
Coronavirusimut akiuussutissaq ilisimatuussutsikkut toqqammaviulluartut aqqutigalugit misilerarneqassaaq, isumannaatsuunera atorneqarsinnaaneralu tassuunatigut paasineqarniassammat. Nakorsaasiorfiit taama nalunaarput.
Coronavirusimut akiuussutissaq qaammatit marluk ingerlaneranni, tassa præsidentimut qinersisoqartussaanera sioqqullugu, piareerneqarsinnaassagunartoq, USA-p præsidentiata Donald Trumpip oqaatigereerpaa.
AAMMA ATUARUK Coronavirusimut akiuussutissamik misileraaneq unitsinneqarallartoq
Nakorsaasiorfiit nakorsaataasinnaasumik sukkavallaartumik ineriartortitseratarsinnaanerannut tamanna ernumalersitsivoq, nakorsaasiorfiit ineriartortitsinissamut pakasarneqaratarsinnaammata.
Nakorsaasiorfiit isumaqatigiissusiartik oqaluttuarisaanermi pingaarutilittut isigivaat.
Nakorsaasiorfiit AstraZeneca, GlaxoSmithKline, Pfizer, Johnson & Johnson, Merck, Moderna, Novavax, Sanofi BioNTechilu isumaqatigiissusiortuupput.
Covid-19-imut akiuussutissaliornermi ilisimatuussutsikkut assuarnaatsumik ineriartortitsinissartik pingaaruteqartikkaat, nakorsaasiorfiit ataatsimoorullugu nalunaaruteqarput.