New Zealandimi ajunaartorpassuit

New Zealandimi ukiorpassuarni najugaqarsimasut annilaanganartumik misigisaqarsimapput.

Christ Churchimi nunap sajunnerata nalaani Rikke Harby illoqarfimmiippoq, taanna ukiuni 14-ini tassani najugaqarsimavoq, nunalu sajulermat perorsaasunngorniat ilinniarfianni ilinniartitsisutut sulivoq.

Misigisaq peqqarneeqaaq. Ilinniartut ilaat ingerlaannaq nerriviit ataannut toqqorterput sivitsunngitsorlu paasinarsivoq tamatta nerriviit ataannut toqqortariaqartugut. Nunasajulermat tupakkaluaqalutik qanoq iliussallutik nalunngilaat. Ukiummi ingerlanerani sisamariarlutik taamatut pisoqalerpat qanoq iliussanerlutik ilinniartut misilittarpaat. Ukualu meeqqerivinni perorsaasunngorniartuugamik qanoq iliornissartik nalunnginnamikku ingerlaannaq toqqorterput. Nuna sajukkunnaarmat tamarmik oqarasuaatitik angallattakkat atorlugit ikinngutitik ilaquttatillu sianerfiginiaraluarpaat taamaalineranili oqarasuaatit aqqutaat kipereersimavoq. Rikke Harbyp meerai kilometerip aappaata affaatut ungasitsigisumi atuartut anaanaata akunnerup aappaata affaatut sivisutigisumik orninniarsarai. Aqquserngit ilaat assersorsimapput biilillu arriitsuaqqamik ingerlaarlutik.

Atuarfimmut apuukkama sooq taama kingusinaartigisunga meeqqat aperaannga. Tusaaginnarlugilli uigalu aamma ajunngitsoq paasillugu eqqissiallaqaanga, Rikke Harby oqaluttuarpoq.