New Jersey-mi toqumut pillaasarunnaassagunarput

Amerikami naalagaaffiit ilaat New Jersey, New Yorkimut saniliusoq oqaluttuarisaanermi nutaanerusumi toqumik pillaasarnermik atorunnaarsitsisut siullersarisinnaavaat.

Ataatsimiititaliarsuup naalagaaffiup Inatsisartuinit pilersinneqarsimasup suliani naammassillugu toqumik pillaasarneq naalagaaffiup inatsisaanit peerneqassasoq innersuussutigaa. Ataatsimiititaliarsuup nalunaarusiaani oqaatigineqarpoq toqumik pillaasarnerup inatsisitigut illersorneqarsinnaanera pissusiviusumik uppernarsaatissaqanngitsoq, aviisimi ullormut saqqummersartumi The New York Times-imi taama allaaserinnittoqarpoq.

New Jersey-mi toqumik pillaasarneq atorunnaarsinneqassappat taamatut pillaasarnerup USA tamakkerlugu oqallisaasorujussuanngoqqinnissaa ilimagineqarpoq. Piffissami kingullermi pillaammik toqutsinerit iluatsinngitsoortut, sivisuumillu naalliutsitsinerusut saqqummiunneqartarput.

FN-ip qullersartaavata Ban Ki-Moonip ippassaq – sulileqqaarnermini – oqaatigereeraalu nunat FN-imut ilaasortaasut toqumik pillaasarneq nammineerlutik aalajangigassarigaat. Taamatut oqaaseqarpoq naak FN-ip toqumik pillaasarneq pisortatigoortumik akerlerigaluaraa.Italiamiut ministeriunerat Romano Prodi oqaaseqarpoq, FN aqqutigalugu nunarsuaq tamakkerlugu toqumik pillaasarnerup inerteqqutigineqalernissaa naalakkersuisumi sulissutiginiaraat.