Nerukkaatissat pillugit Qimussertartut kattuffiat isumaqatigiissuteqalerpoq

Kalaallit Nunaanni Qimussertartut Kattuffiat qimmit nerukkaatissaat pillugit nutaamik isumaqatigiissusiulerpoq. Nerukkaatissat Danmarkimi qimmit nerisassaannik nioqqutissiorfik Royal Canin-imeersut qimminut peqqinnassusaat maluginiarneqarluarsimavoq, taamaattumillu ukiuni tallimani tullerni atuuttussamik isumaqatigiissuteqarnissartik aalajangiullugu kattuffimmi siulittaasoq Mikkel Jeremiassen oqarpoq.

-2000-ikkut aallartitaarneraniit Royal Canin Avannaata Qimussersuanut tapersuilernikuuvoq, qimmit nerisassai eqqarsaatigalugit. Tassanngaanniit suleqatigiinnerput annertusiartuinnalernikuuvoq massakkullu isumaqatigiissutikullarujussuarmik, taamatummi oqaatigisariaqarpoq, isumaqatigiissuteqalerluta. Mikkel Jeremiassen oqarpoq.

Ukiumiit ukiumut isumaqatigiinniartaraluarneq allanngortillugu ukiumut tallimanut atuuttussamik isumaqatigiissummik koruunit millionit missaannik nalilimmik atsiugaqartussaapput.

- Qimmit nerisassai atuisunit ilaasortatsinnit aamma nersualaarneqartupilussuunikuupput. Qimminut nukersortumut imaluunniit timersortumut, tassa sulisumut naleqqussagaapput. Qimmit timaasa pisariaqartitaanut assigiinngitsunik akulipilussuullutik ujaluinut, nukiinut assigisaannullu pitsaasorujussuarmik misilittagaqarfigineqalernikuupput ilaasortatsinninngaanniit, nassuiaavoq.

Aperaarput sooq ukiunut tallimanut isumaqatigiissusiorniarnersut.

-Illuatungeriilluta suleqatigiissimanerput iluatsittutut nalilersimavarput, taannalu tassa tunngaviuvoq taamatut annertutigisumik ukiorpaalussuarnut siumut isigaluta atsioqatigiittussanngornitsinnut, oqarpoq.

Avannaata qimussersuanut annguttunut tamanut nerukkaatissat Royal Canin-imeersut tunissutigineqartassapput, aammali sinerissami qimuttoqarfinni nalinginnaasumik pisiassanut ilanngullugit pisiassaalernissaat sulissutigineqarpoq.

- Qimmiutillit ulluinnarni iuertarfimminni sumiikkaluarunilluunniit taakkunannga pitsaasunik pisiassaqalersinnaanera Pilersuisorlu ukiormanna naatinnagu aaqqiissuteqarfigissavarput.

Mikkel Jeremiassen taama oqarpoq. Nerukkaatissat Royal Canin-imeersut sinerissami illoqarfinni niuertarfiit ilaanni ikittuinnarni manna pisiarineqarsinnaapput, nunaqarfinnili aamma pisiarineqarsinnaalernissaat sulissutigineqarpoq.

Atsioqatigiinneq Nuugaatsiami, Uummannap pigisaani aggustip naggataani pissaaq.

Ukiormanna Avannaata qimussersuanngortoq Jørgen Kristensen, Ilulissaneersoq misiligummik qimmini siorna septembarimili nerukkaatissanik Royal Caninimeersunik nerisittarsimavai. Oqarpoq qimmini peqqinneruliinnaratik, aammali qiimallutillu qasujaannerulersut.