Nerukkaatissaqarniarnerup ajornartorsiutaanera iliuuseqarfiginiarpaat
Sisimiuni qimmiutillit nerukkaatissanik pissarsiniartarnerat ajornakusoornerulersimasoq, qimmiutillit tusagassiuutinut nalunaarumminni allapput. Ingammik ukiormanna qalerallit perlukui Qasigiannguakkunniit pissarsiarinissaat ajornarsimammata.
Qimmiutillit nerukkaatissanik nunatsinneersunik pissarsisinnaanerup ajornannginnerulernissaa sulissutiginiarpaat, tassami nerukkaatissat avataanniit tikisitat akisuallaarmata, aammali avatangiisitta pisuussutaanik atorluaanerunissaq siunertaralugu. Taakku tikkuarpaat, sumiiffiit ilaanni puisit amiiginnakkat aamma qalerallit perlukui eqqaannarneqartartut, qimminut nerukkaatissatut piukkunnarluinnaraluartut.
Sinerissamiit qimminut nerukkaatissanik Sisimiunut assartuineq peqatigiiffiup aaqqissuunniarpaa.
- Qangaaniit naggueqatigiit Inuit piniakkaniit suna tamaat atorluarlugu igitaqaratik inuuniarnerminni toqqammavigaat. Tamanna imminut napatissinnaanermut pissuseq ullumikkut nunatsinni inerissimaqisumi, piisaarnerusariaqaraluartoq qaqittariaqarparput avammullu takutillugu pimoorukkipput, oqarluta: Kalaallit Nunaat eqqiluitsuuvoq uumasunillu asanniffiulluni, qimmiutillit ilaatigut taama allapput.
