Nersut qaasuttoq siullerpaaq nunatsinneersooratarsinnaavoq

Taanna tassaavoq Tamisiocaris boreales, Uppsalamilu Universitetimi doktorinngorniummi nersut taannarpiaq tassaassangatinneqarpoq Nunarsuatsinni nersutit qaasuttut siullerpaartaat. Atuagassiami Ingeniørinimi tamanna allaaserineqarpoq.

Ineriartorneq pillugu ilinniarnermi malilluarniaqqissaarneqartaqisumi allassimavoq, uumasut assigiinngitsut amerlanerpaartaat ukiut 520 millionit matuma siorna qanigisariilersut. Nersutit qaasuttut uumasut pisatik taamanikkut naleqqussartarpaat, imaluunniit toqorarlutik nunguttarput, nersutillu qaasuttut taamanimiilli taamaalillutik assigiinngisitaarlutik amerliartulerput.

Tamisiocaris borealesinik ujarannguussimasunik nassaarnissaq manna tikillugu amigaataasimavoq. Ujarannguussimasut nassaarineqartut siulliit Sirius Passimi 1991-imi nassaarineqarput, isikkuili aatsaat maanna allaaserineqarlutik.

Doktorinngorniummik allattup, biologip Allison Daleyp oqarnera malillugu, Tamisiocaris borealesit nersutinut qaasuttunut assingusunik pisatarpassuaqarput.

Nersut meterimik ataatsimik takissuseqarpoq, itsarsuaq uumasut eqqarsaatigissagaanni angisoorujussuartut oqaatigineqarsinnaalluni. Saavatungimini talimut assingusumik peqarpoq, qarnga kiguterpassuaqarluni taava aamma avaleraqarpoq, taamaammat imaani sukkasoorujussuusimassalluni.

Tamisiocaris borealisit ujarannguussimasut Kalaallit Nunaata Avannaani taamaallaat nassaarineqarsimapput.