Nersussuartunnginneruneq mingutsitsinannginneruvoq

Hollandimiut ilisimatusartut silap pissussaata allanngoriartorneranut isummersorsimapput. Tassami taakkua naatsorsuinerminni ilanngullugit naatsorsorsimavaat, nunaminertat annertoorujussuit, nersussuarnut ivigartorfissiarineqartartut aamma nersussuarnut nerukkaatissiarineqartartorpassuit.

Nittartakkami ingeniøren.dk-mi oqaatigineqarpoq, Hollandimiut naatsorsuinerminni paasisimagaat, inuup ataatsip agguaqatigiissillugu sapaatip akunneranut nersussuarmit neqitortagai maanna 1.400 gramiusut 70 grammiinarnut aamma kukkukuuaqqanit manninnillu 325 gramminut appartinneqarsinnaappata, taava nunarsuarmiut nunarsuup kiatsikkiartorneranut akiuiniarnerminni 110.000 milliardit koruuninik ileqqaagaqarsinnaasut. Minnerunngitsumillu nunap ilaa 15 millionit kvadratkilometeriusoq nersussuarnut atorneqartarunnaassagaluartoq, tassa USA-p marloriaataata affaatut annertussusilik.