Nersualaarinissaq puigornagu
Inersimasut akornanni nakkarsaattarneq pillugu Qaasuitsup Kommunia illoqarfinni arlalinni ataatsimiisitsisareerpoq. Tallimanngornermi unnukkut tamannarpiaq qulequtaralugu Qeqertarsuarmi innuttaasunik ataatsimiisitsisoqarpoq ataatsimeeqataasullu nassuerutigaat inersimasut akornanni nakkarsaattarneq ileqquliussatut atugaalersimasoq.
Tamannali unitsinniarneqapoq. Taamaammat nammineq piumassutsimik suliniartussat pilersinneqarput inersimasut nakkarsaattarnerisa akiorniarnissaanik suliaqartussat illoqarfiup pitsaaliuinermut siunnersortaa suleqatigalugu.
- Qaasuitsup Kommuniani pitsaaliuinermut allaffimmiit Ellen Heilmann Lyberth ataatsimiinnermi aallarniuteqarpoq tusarnaariallu tusakkatik ilisarsiffigaat. Tassami inersimasut akornanni nakkarsaattarneq ileqquliutiinnakkatut ulluinnarni atuutilersimavoq, Qeqertarsuarmi pitsaaliuinermut siunnersorti Maasinnguaq Berthelsen KNR-mut oqarpoq.
Ataatsimiittut eqimattakkaarlutik oqallinnikkut ataatsimiinneq nangippaat ilorraallu tungaanut aallariarnissamut sakkussanik taakkartuillutik.
- Kaammattuutigineqartut ilagaat allat nersualaarnissaasa pikkoriffiginerunissaa nakkarsaaneq igutsinerlu pinnagit. Ilorraap tungaanut aqqutissaasinnaasutut aamma tikkuarneqarput ammanerusumik oqallinneq aammalu inuit allat eqqartorneranni oqaatsit aninneqartut eqqarsaatigilluagaanerunissaat, Maasinnguaq Berthelsen oqarpoq.
Maanna nammineq piumassutsimik suliniartussat arfineq pingasunik inuttallit pilersinneqarput inersimasut nakkarsaattarnerisa akiorniarneranik ingerlatsisussat. Taakku isumaqatigiissutigaat ajornartorsiutip taassuma malunnarsigaluttuinnartup akiorniarnera saqquminerusumik ammasumillu oqallinnikkut pissasoq.
