Nersornaatisisut ikiliartuinnarput
Nersornaammik saqqarmiuliinerit ukiormanna siornalu pingasuinnaat tunniunneqarput - ukiumut kuulti ataaseq sølvillu marluk tunniunneqarlutik.
Nersornaasiinerit 1992-imiit aatsaat taama ikitsigilerput, aamma 2000-ikkut aallartinneranni ukiuni siullerni arfineq pingasunit ikileriarnerujussuuvoq, taamanikkummi nersornaasiinerit qulingiluariaammik amerlanerugaluarput. Radioaviisimi misissuinitsinni taama paasisaqarpugut.
Nersornaat tassaavoq Nunatsinni oqartussat, kalaallinut imaluunniit nunani allamiunut "Nunatsinnut nersortarialimmik iliuuseqarsimasunut" ataqqinninniutitut nersorinninniutaat.
Nersornaat 1989-imili tunniunneqartalerpoq - taamanikkut Namminersornerulernerup ukiunik qulinngortorsiorneranut atatillugu siullermik nersornaasiisoqarpoq. Taamanikkut 31-nik nersornaasiisoqarpoq - tassa ukiormannamiit quleriaammik amerlanerusunik.
Inatsisartut siulittaasoqarfiat nersornaasiinissanik aalajangiisartuullunilu tunniussisartuuvoq.
Nersornaammik kuultiusumik saqqarmiulerneqartoq kingulleq tassaavoq Naalakkersuisut siulittaasuat Kuupik Kleist. Allat 36-t taamatut kuultimik saqqarmiulerneqarsimapput. 230-t sinnillit sølvimik nersornaatisisimapput.
