Nersornaasiinermi ingerlatitsisup Trump isornartorsiorniarlugu Kalaallit Nunaat eqqaagaa
Ukioq manna Grammy-nik nersornaasiinermi ingerlatitsisup Trevor Noah-p sapaatip unnuaani Kalaallit Nunaat eqqaavaa.
Nutaarsiassaqartitsivik Associated Press taama allappoq.
Erinarsortartoq Billie Eilish erinarsuusiorluarnerpaatut nersornaaserneqareersorlu, Noah-p USA-p præsidentia Donald Trump marloriarluni isornartorsiorpaa.
- Una Grammy eqqumiitsuliortut tamarmik pissarsiarerusuttarpaat - Trumpip Kalaallit Nunaannik kissaateqarneratullingajak, tamannalu paasinarpoq. Tassami Epstenip qeqertaa peerummat, Noah oqarpoq.
Trumpip "nunap isumannaatsuunissaa eqqarsaatigalugu" Kalaallit Nunaata Amerikamiunit aqunneqalernissaanik kissaateqarnerminik ukioq manna siusinnerusukkut arlaleriarluni oqartarsimaneranut quiasaarisartoq innersuussivoq.
Epsteinimut tunngasunik arlaleriarluni attuumassuserneqartoq
Kalaallit Nunaannik piginnikkusulernera Danmarkimi, Kalaallit Nunaanni, Europami nunarsuarmilu tamarmi uissuummissutaavoq.
"Kalaallit Nunaat pissavarput"-mik arlaleriarluni oqartareerluni, Issittoq pissaaneqarfiginiarlugu sakkuaannissamik atuiniannginnini Schweizimi World Economic Forum-imi januaarimi oqaatigaa.
Aamma Donald Trump aningaasaatilissuarmut kinguaassiuutitigullu kannguttaatsuliorfiginnittarnermigut pinerluttutut eqqartuunneqarsimasumut Jeffrey Epsteinimut arlaleriarluni atassuserneqarsimavoq. Sapaatip-akunnerata siuliani USA-p eqqartuussiveqarnermut ministereqarfiata uppernarsaatit Epsteinimut tunngasut tusindillit saqqummiuppai.
Jeffrey Epstein Ghislaine Maxwellilu 2000-ikkunni inuiaqatigiinni nuimasunut festertitsisarput katerisimaartitsisarlutillu.
Ilagisartagaasa ilagaat USA-mi præsidentiusimasoq Bill Clinton aamma maanna præsidentiusoq Donald Trump, taakkualu Epstein susassariunnaarlugu kingorna nalunaarutigaat.
Epstein ilaatigut Caribiami qeqertaateqarsimavoq, unnerluutiginnissutillu naapertorlugit tassani innarliinerit ingerlanneqartarsimapput - aamma niviarsiaqqanut ukiukitsunut.
Trump Epsteinip qeqertaaniissimaneranut uppernarsaatissaqanngilaq, namminerlu taamaaliorsimannginnerarpoq.
- Qeqertaataanut tikeraarnissara immikkut pisinnaatitaaffigisimanngisaannarpara, taamaaliorusussimanngilangalu, Reuters naapertorlugu siorna juulimi tusagassiortunut oqarpoq.
Trumpilli Epsteinip timmisartuanik ukiuni 1993-ip 1996-illu akornanni arfineq-pingasoriarluni angalasimanera uppernarsaatissaqarpoq.
/ritzau/
