Nersornaasiineq Vatikanemit isornartorsiorneqarpoq
Vatikanip inuup timaa pillugu isummersortarneq pillugu oqaaseqartartuata Nobelimik nersornaasiisartut nersornaasigassamik toqaanerat iluarinngilaa.
Nobelip nakorsaaserineq pillugu nersornaasiuttagaa angummut 85-inik ukiulimmut, Robert Edwardsimut ukioq manna tunniunneqassaaq, taanna meeqqap mannissaqarfimmit peerlugu pinngortinneqarsinnaaneranik aqqutissiuisuuvoq.
Pavilli inuuneq pillugu ilinniarfiani aqutsisup nersornaasiineq akuerisinnaanngilluinnarpaa.
Edwardsip ilisimatusarnera pisuulluni maanna inuup mannissai tuniniagaalersimasut katuullit oqaluffiata inuup timaa pillugu isummersortarneq pillugu oqaaseqartartoq oqarpoq aammagooq nunarsuarmi qerititsivippassuaqarpoq naalungiarsuit timaannik ulikkaartunik.
- Tassa Nobel-imik nersornaasigaasup akisussaaffia, oqaaseqartartoq oqarpoq.
Eqqissinissaq aammalu atuakkialerineq pillugit nersornaat nalinginnaasumik oqallitsitsilersaraluarpoq. Eqqissinissaq pillugu kina nersornaaserneqassanersoq tallimanngorpat nalunaarutigineqassaaq.
Nersornaammik agguaasartut Norgemiuusut Kinamiunit oqarfigineqareerput Kinamiumik aqutsisunik isornartorsiuisartumik nersornaasiinialissagaluarpata Kinap iluarinngilluinnarumaaraa.
Katuullit oqaluffiata nakorsaaserineq pillugu nersornaasiuttagaq isornartorsioraa nersornaasigaasoq, Edwards, inuppassuarnit qujagineqassaqqooqaaq, 1978-imiimmi ullumikkumut Edwardsip aqqutissiuussineratigut meeqqat 4 millionillit mannissaqarfimmit peerlugit inunngortinneqarput.
Nobelip fysikki pillugu nersornaasiuttagaanik tigusisussaq ullumikkut oqaatigineqarpoq.
Taanna ilisimatusartunut marlunnut tamatta nalunngisatsinnik nassaarsimasunut tunniunneqassaaq.
Nersornaaserneqartussat tassaaput Ruslandimiut fysikerit marluk, 51-inik ukiulik Andre Geim aamma 36-iinnarnik ukiulik Konstantin Novoselov, taakkua grafi nassaarisimavaat.
Grafi tassaavoq qarasaasiap umeruaa attuinnarlugu, tassa tuuinnarlugu, toqqartuisinnaanermut atortoq, touchscreenimik taaneqartartoq.
Qaammataasat, timmisartut amma biilit atortumik taassuminnga ninngulluinnartuusumik siunissami atortulersorneqarumaartut ilimagineqarpoq.
