Nersornaasigassatut piukkunneqartut kalaalertaqassapput
Hans Anthon Lynge radioaviisimut oqarpoq qanittukkut aalajangiiniartussaallutik, nersornaaserneqartussatullu piukkunneqartup kinaassusaa oqaatigisinnaanngikkallarnerarpaa.
Nunat Avannarliit Siunnersuisoqatigiiffiata atuakkiortunut nersornaasiuttagaa oqaluttualiortunut tunniunneqartarpoq. Atuagaq atuakkiaasinnaavoq, taallianik imaqarsinnaavoq imaluunniit oqaluttualianik naatsunik imaqarsinnaalluni. Atuagaq nersornaasigassatut piukkunneqartoq nunani avannarlerni oqaatsit arlaalluunniit atorlugu allanneqarsimassaaq.
Naja Marie Aidtip atuakkiaa ”Bavian” siorna nersornaaserneqarpoq. Kalaallit Nunaanni tamanna nuannaajallaatigineqaqaaq, Naja Marie Aidt Aasianni inunngornikuummat tassanilu peroriartorluni. Apriilip pingajuani 2009-mi nersornaasiisoqassaaq. Nersornaat 350.000 koruuninik aningaasartaqartinneqartarpoq.
