Nersornaasigaasoq tapersersorpaat

Amerikamiut præsidentiata, Barack Obamap, kiinamiut kaammattorpai nersornaaserneqartoq paarnaarussaaqqaneranit iperassagaat oqarlunilu:

- Ukiuni 30ini qaangiuttuni aningaasaqarnermik aqutsinermik aaqqissuusseqqinnikkut, innuttaasut inuunerannik pitsannguinikkut inuppassuillu piitsuujunnaarnerisigut Kina siuariartupiloorsimavoq. Nersornaasiinerulli uuma eqqaasippaatigut politikikkut aaqqiissuseqqinnerit taama sukkatigisumik ingerlasimanngitsut, inuillu tamarmik toqqammaviusumik pisinnaatitaaffii angutaappata arnaappata meeraappataluunniit ataqqineqartariaqartut, ukioq kingulleq nersornaasigaasoq Obama taama oqarpoq.

Tibetimiut anersaakkut siuttuat Dalai Lama neriuppoq, isumalioqqissaarnermut ilisimatooq inuillu pisinnaatitaaffiinik sorsuutiginnittoq Liu Xiaobo, Kinami aaqqissuusseqqinnerit sukkanerusumik ingerlanneqarnissaannut aqqutissiuissasoq.

- Politikikkut, eqqartuussisutigut nunallu naalakkersuinikkut iluarsaanneragut aaqqissuusseqqinnissamut innuttaasut amerliartuinnartut kissaateqarnerat nunat assigiinngitsut akornannit akuerineqarnera nersornaasiinikkut ersersinneqarpoq. Dalai Lama nalunaarummini taama allappoq.

Dalai Lama 1989imi eqqissinissamik suliniuteqartutut nersornaasigaavoq, taamani aamma Kinami naalakkersuisunit kamaatigineqaqisumik. Jyllands Postenip ilanngutassiortua malillugu maanna nersornaaserneqartoq ilisimaneqarpianngilaq.

- Kiinamiut aqqusinermi naapitat aperigaanni kinaanersoq nalusarpaat. Tusagassiuutit nakkutigineqarnermik oqallittoqanngilaq taamaalillunilu isorinnittut saqqummerneq ajorlutik.

Liu Xiaobo ukiuni aqqanilinni paarnaarussassanngorlugu eqqartuunneqarnikuuvoq inuiaqatigiinnut ajoqutaasumik suliaqarsimanera pissutigalugu.