Nerlerit Inaat ukiup mittarfiatut toqqagaasoq

- Avinngarusimasutut inissisimaffiup sulisut pisortallu assorsuaq piginnaasaqarlutillu pilersitsiumatuut pisariaqartippai. Arnat angutillu ”eqqortumik pissuseqartut” mittarfimmiittuupput.

Mittarfeqarfiit pisortaanerat, Henrik Estrup tusagassiuutinut nalunaarummi allappoq.

Nerlerit Inaat Tunup Avannaani, Ittoqqortoormiit avannaaniippoq. Sulisut qaqutiguunngitsukkut tigussaasutut atugarisat artornarlutillu tamaviaarfiuneranni tamakkiisumik nammineersinnaassutsimik ingerlatsillaqqinnermillu takutitaqarsimasut Mittarfeqarfiit allapput.

- Mittarfimmi sulisut pisortallu sungiussiassutsimik takutitaqarput, aammalu mittarfimmik inuiaqatigiinnillu ikittunik inuttalinnik pissutsit artornartut atorlugit ingerlatsinissamik sammisaqarlutik

- Tamanna assut isumannaallisaanermik sammisaqarluni mittarfimmik ingerlatsinermik, findingsinik ikittunik peqartumik kinguneqarsimavoq, tassaallutik piumasaqaatinut, tulluartumillu angallannerit assigiiaartumik ingerlasarnerannut naleqqiullugit sanioqqussinerit, pisortaq oqarpoq.

Nerlerit Inaat Ittoqqortoormiinut Tunup avannaata sinneranut kisiartaalluni attaveqarfiuvoq. Taamaammat mittarfik Mittarfeqarfinnut pingaaruteqarpoq.

Nerlerit Inaani mittarfiup pisortaata, Robert Schilling Larsenip Mittarfeqarfinnit nersornaat aallugu Nuuliarpoq.

Nersornaat Mittarfeqarfinnit ukiut tamaasa tunniunneqartarpoq, nersornaasiinermilu mittarfimmi suliaqarnerup nersorneqarnissaa malugineqartinnissaalu siunertaavoq.

Nuummi mittarfik siorna ukiup mittarfiatut toqqarneqarpoq.