Neriusaami sulisut akisussaaqataanissaat pingaartinneqarpoq

Sulisut suliffimminni akisussaaqataanissaat aamma suliffimminni aalajangeeqataanissaat tassani pingaartinneqarnera, ilaatigut tunngaviklersuutigineqarpoq.

Sulisut pikkoriffii isiginiarneqartartut, Utoqqaat illuanni pisortap oqaatigaa.

- Sulisut pikkoriffii maluginiaqqissaarlugit nersualaartarlugit, kukkunerit tikkuartunngukkaluargit. Tikilu takisooq atornaguk aqutsineq ingerlanneqarpoq, Arnannguaq Heilmann taama oqarpoq.

Taanna Angerlarsimaffimmi Neriusaami 2010-imi ulluinnarni aqutsisunngorpoq. Aallartikkami unamminartunik aqqusaagaqarpoq, sulisut allanngorarpallaarsimammata. Taamaanneralu qaanerngerlugu  sulisut pisinnaasaat tunngavigalugit ingerlatsilersimavoq. 

- Naqqaniik aallartinnitinninngaanniit ilinniarsimasunik amigaateqarneq unammiartuusimavoq, taamaakkaluartoq sulisut ilinniarsimasuunngikkaluarlutik tunniussassanik pikkoriffinnillu ulikkaarput. Sulisut pikkorfii tappiffigalugit, qaffassartarlugillu ulluinnarni ingerlatsivugut, Arnannguaq Heilmann taama oqarpoq.

Sulisut suliffimminni kajumissuseqarnissaat anguniarlugu suliffeqarfik assigiinngitsunik naammassiniagaqartarpoq, ilaatigullu nersornaasiisoqartarluni.

- Sulisutsialannik maligassiuisunillu toqqaasalernikuuvugut qaammatit tamaasa. Ukiullu naanerani sulisutsialanngortoq akissarsitinneqartussaavoq - Island-imut. Namminerlu suleqatini ilagerusutani toqqassallugu, Arnannguaq Heilmann taama oqarpoq.

Utoqqaat Illuanni aamma utoqqaat ilaqutaat pingaartinneqarput. Taakkualu akuunerulersinniarlugit ilaquttanut ataatsimiitsitaliamik aallartitsinikuupput. Ukiumut arlaleriarlutik ilaquttanut ataatsimiitsitsisarput, ilaqutariinullu ataatsimoortitsinisaq pingaartittarlugu. Ilaquttanut ataatsimiitsitaliaq iluaqutissartaqarluartutut, Arnannguaq Heilmannip nalilerpaa.

- Ilaqutariit ataatsimiitsitaliornikuuvugut, taakkullu suleqatigilluarlugit. Massakkut asiartarfiliulerpugut, toqqavissaa sanareernikuuarput, aappaagu naammassissavarput. Taamaalilluta aasakkut nammineerluta piliartorsinnaalluta qaammaterpassuillu najorsinnaallugu, Arnannguaq Heilmann taama oqarpoq.

Angerlarsimaffik Neriusaaq tarnikkut avatangiiserissaarnerpaatut toqqanneqarnera, naujugaqartup 85-inik ukiulik Esther Larsen tulluusimaarutigaa, taassumalu angerlarsimaffini toqqisisimanartuunerarlugu.

- Assut nuannerpoq. Soorlu angerlarsimaffivittut  misigisimanarpoq, Esther Larsen taama oqarpoq.