Neriuffik: Suliniutit amerlineqarsinnaalerput

Kræftimik napparsimalersartut Nunatsinni ukiumut 170-it missaanniittarput. Taakku ilaat 138-t, Neriuffimmit siorna aningaasanik ikiorsiiffigineqarput.

Arfininngormat katersuiniarnerup kingorna, Neriuffiup siulersuisuisa ataatsimiinnerminni, eqqartorneqartugaannut ilaavoq, suli amerlanerit aningaasanik ikiorsiiffigineqartarnissaat maanna periarfissaalersoq. Aammali allanik periarfissaqalersoq, Neriuffiup siulittaasuata, Sara J. Brandtip oqaatigaa.

- Eqqartukkatsinnut aamma ilaavoq, aappassaanik napparsimalernermi aningasanik tapiiffigineqarnissamik qinnuteqartoqarsinnaalernera. Tamannalu eqqartoqqinneqassaaq katersuiniarnermi aningaasat qasserpiaat isertinneqarsimanersut paasilluareerutsigu, Sara J. Brandt oqarpoq.

Aappassaanik tapiiffigineqartalernissap saniatigut, siunnersuisarfimmik pilersitsinissaq maanna aallartisarneqarsinnaalersoq, Neriuffiup siulittaasuata aamma oqaatigaa.

- Tassalu, napparsimasut taassumalu ilaqutaasa, tarnip pissusaanik ilinniarsimasumit siunnersorneqartarnissaat misissorlugu siullertutu aallartittussaavarput. Aamma misissussavarput, oqarasuaatit angallattakkat atorlugit sms-ikkut saaffiginnittut aamma soorunami oqarasuaatitigut naliginnaasutigut saaffiginnittut, siunnersorneqartalernissaannik eqqarsaat qanoq piviusunngortinneqarsinnaanersoq eqqartorlutigu, Sara J. Brandt oqarpoq.

Neriuffiup aningaasanik katersuiniarnera, arfininngormat unnukkut marsip aallaqqaataani ingerlanneqartoq, iluatsilluartutut Neriuffiup siulittaasuata oqaatigaa. Sara J. Brandtillu nuannaarutaanut ilaavoq, inuit naapitami qisuariaataat nuannersut.

- Pitsaasumik siunertaqarluni katersuiniarnerput pillugu naapittatta tamarmik pilluaqqusarpaatigut, atmannalu tuppallernarpoq qujanarlunilu. Tassalu maanna paasiniaalereerpugut aappaagu piffissami tassanerpiaq katersuiniaqqittoqarsinnaaneranik. Neriuppugullu tamanna ukiut tamaasa pisalersinnaassasoq, tassami suliniutitsinnut pitsaasumut tamanna ikorfartuutaassussaammat.

Neriuffiup siulittaasuata, Sara J. Brandtip aamma oqaaatigaa, aappaagu katersuiniarnissamut pilersaarut iluatsissappat, pisiniarfeqarfissuarmi Nuuk Centerimi tamanna ingerlateqqinneqarsinnaasoq, tassani oqartussaasunit tapersersorneqarluarmat.