Neriuffik: Socialfondiliorniarneq tusarlugu iluaq
Ilungersunartumik napparsimasoqartillugu, illoqarfigisarlu qimallugu sivisunerusumik katsorsartittoqartariaqalersillugu ikiuisartussatut aningaasaateqarfik pilersinneqarpoq.
- Aningaasaateqarfiup isumaqatigiissuteqarnikkut pilersinneqarnera assorujussuaq iluarisimaarparput, Neriuffiup siulittaasua Johanne Olsen oqarpoq.
- Neriuffimmi ukiuni arlalissuarni paasitinneqartuarpugut napparsimalernermi inuuniarnikkut atugassarititaasut allanngornerini aningaasaqarniarneq aporfiusaqisoq pingaartumillu ilaqutaasut angalaqataanissaannut aningaasassaaleqineq annertusaqisoq, Neriuffiup siulittaasua nangippoq.
Nappaammik kræftimik akiuiniaqatigiiffiup SIK-p sulisitsisunik isumaqatigiissuteqarnerani kiisami inuit nappaammik eqqugaasut pisariaqaqisumik ikiorserneqarsinnaanermik periarfissaqalersimmagit iluaraa.
- Sulisitsisut allat kajumissaassavagut SIK-p isumaqatiginninniarnerani aningaasaateqarfimmik taamaattumik pilersitsinissaq ammaffigeqqullugu, pisariaqartinneqaqimmat, Neriuffup siulittaasua Johanne Olsen oqarpoq.
