Nerisat naarmiumut sunniuttarput

Ukiorpassuarni tusartuarparput arnaq naartulluni pujortarpallaarlunilu imigassartorpallaaruni naartuni ajoqusersinnaagaa. Tamanna nalunngilarput.

Arnarli naartusoq peqqinnanngitsunik nerivallaaruni naartuminik ajoqusiisinnaanera ilisimaneqarpianngilaq. Maannali uppernarsineqarpoq arnaq naartunermi nalaani peqqinnanngitsunik nerivallaaruni meeraata inooreeruni ilaatigut uummalluutinik sukkornermilluunniit nappaateqaleqqajaanerusartoq.

Ilisimatuut teriarsuarnik misissuinerminnit paasisatik pisimavaat. Teriarsuit maajugineqartaraluaqalutik, nerisat timimut sunniuttarnerat eqqarsaatigalugu inunnut assersuunneqarsinnaapput.

Ilisimatuut teriarsuit naartuneranni milutsitsinerannilu peqqinnanngitsunik, soorlu naatsiianik panertunik, kaaginik tamulugassanillu allanik nerisitarereerlugit paasivaat piaqqat pualareertartut, peqqinnanngitsunillu nererusunnerusartut, taakkualu ilaat peqqinnartunilluunniit nerisinneqaleraluaraangamik assigiinngitsunik nappaateqaqqajaanerusartut. Piaqqat peqqinnanngitsunik orsoqartarlutillu aavat insulinimik glucosemillu akoqarnerusarpoq, taamaammat diabetes-2-mik, utoqqaat sukkorutaannik taaneqartartumik, nappaateqakkajunnerusarlutik.

Misissuinerit aamma takutippaat piaqqat arnavissat aavanni leptin-imik hormoneqarnerusartoq, taannalu nererusunnerulersitsisarmat piaqqat suli puallajanerusarput. Ilisimatuut misissuisut ilaat oqarpoq pualaneq nappaateqakkajunnerluunniit pinngitsoorneqarsinnaanngitsut, teriarsuilli misilittaatiginerannit paasisatik inunnik misissuisarnerminnit paasisanut sanillersuunneqarluarsinnaasut.