Nerisassanik maangaannartitsisarneq Brugsenip annikillisarusukkaa
Ilaatigut Danmarkimi ukiut tamaasa nerisassat 700.000 tonsit nerineqarluarsinnaagaluartut qaangiuttoorsimaneri pissutigalugit kasiilerlugit igiinnarneqartarput.
Nunatsinni aamma nerisassat aningaasarpassuarnik nalillit ukiut tamaasa igiinnarneqartarput, tamannalu atuisartunut, niuertarfinnut avatangiisinullu iluaqutissartaqanngitsoq, Brugseni isumaqarpoq.
Taamaammat Brugseni "Atorluaasa - madfornuft" oqariartuutigalugu suliniuteqalerpoq, nioqqutissat ulloq qaangiuttoorfissaata qanillinerani akikillingaatsiarneqartassapput, taamaattumillu piffissap sivisunngitsup iluani nerineqareersimassassallutik.
"Atorluaasa - madfornuft"-imut immikkut nillartaartitivik
- Pisiniarfiutsinni anginerusuni tamani nillataartitsivimmik ”Atorluaasa – madfornuft”-imik allaqqasumik peqarpugut, pisisartutta nerisassat assigiinngitsut akikillingaatsiakkat nassaarisinnaaniassammatigit,
Brugsenip pisortaanera Susanne Christensen tusagassiorfinnut nalunaaruteqarluni taama allappoq.
- Brugsenimi ukiumut nerisassat eqqaannakkat procentimik affarmik annertussuseqartarput, aningaasanngorlugu 3,5 millioninik naleqartunik. Nerisassanik maangaannartitsinerup saniatigut nioqqutissat nunatsinnut angallannerini co2-mik atuineq aamma pisarpoq. Nerisassanik maangaannartitsinerup eqqumaffigineqarneratigut taamaalilluta aamma avatangiisitsinnut ajunngitsuliorsinnaavugut, Brugsenip pisortaanera taama naggasiivoq.